Հասմիկ Սարգսյան. ԸՆԾԱՅԱԲԵՐՈՒՄ

Posted On 22 Հնս 2022

(Գրիգոր Նազարյանի «Մարիամական» կտավի մոտիվներով)

Ոնց բեմառաջին օրհնության համար պտուղն է շարված,
Որթատունկերից քաղված խաղողի ճութեր ոսկեհատ,
Նռներով լեցուն սկիհներ՝ պղինձ և կլայեկցած,
Նոր ճմուռ արած՝ կավե կժերով գինի նորահաս,
Որ մաճառ է դեռ, բայց ումպ անելիս ինքն է զգլխիչ,-
Ահա նույնությամբ ընդառաջ կգան՝ մանուկներ գրկին
Մանկամարդ հարսներ՝ մետաքսե շղարշ գլխանոցներին,
Փեշերին գործքով վիշապահյուսքի՝ որպես համայիլ,
Եվ դաստակներին որդիք՝ ազատված բարուրաշորից՝
Ընծա, որ կարվի Սուրբ Մարիամական խոհականությամբ,
Ի սկզբանե ի սեր մարդկության լուռ զոհողությամբ,
Հանուն բժշկման, որ պիտի արվի անվարձ, անարծաթ,-
Պիտի առաջ գան և մկրտության ջրով ողողեն
Այն քառասնօրյա նորածինների մարմինները մերկ,
Ընծայաբերման արար կլինի խաղողօրհնեքի,
Մայրերը՝ գավթում, մանչերը ազատ կվազեն բեմին,
Որից նռների ճաքած հյուսքերից հյութը կհոսի
Եվ գինու համով ընծայաբերման արյունը հուռթի․․․