Վ.արուժան Խաստուր. ՏՂԵՐՔ…

Posted On 24 Օգս 2021

Տղե՛րք, լույսի նման տղերք,
Մեր չմարող հույսի նման տղերք,
Չկեռացող, չհեռացող տղերք,
Հեքիաթներից ոսկի խնձոր
Ու հավատամք բերող
Խենթ ու խելառ տղերք,
Մեծ ու փոքր հարգող՝
Սրտներդ բաց տղերք,
Նեղյալներին ոգի
Ու հաց տանող տղերք,
Ձեր մարմինը կամքով,
Արիական ջանքով

Ու տքնանքով
Մարզող տղերք,
Մեր դրոշը
Աշխարներին
Հպարտութամբ պարզող ,
Ցնծավա՜ռ ու կիզո՜ւն,
Մեր դյուցազուն տղերք,
Մեր երազից ծլած,
Մեր անուրջից ծնված,
Կաղնիացած,
Մեր դաշտերը հերկող,
Մեր ապագան բերքող,
Տիեզերքը պեղող,
Մեր արտերին պապակ
Անձրևի պես տեղող,
Օջախ պահող
Ու շենացնող
Մեր էության տղերք,
Մեր գիտության տղերք…։

Տղերք՝ Վահագնաբոց,
Տղերք՝ վեհ ու հուրհեր,
Տղերք՝ կամքով արի,
Մշտազորեղ, բարի,
Գաղափարի տղերք,
Արծըվի պես ճախրող
Եվ սիգապանծ, անանց
Մեր վեհապանծ հուշի
Անդրանիկի ու Չավուշի տղերք,
Մեր հայրենի հողը
Ձեր ավիշով օծող,
Նաիրալույս արյամբ
Երկիր պահող՝
Մեր բալասան տղերք,
Արևածուփ ու բորբ
Մեր սրբազան տղերք,
Մեր գալիքի տղերք,
Հայրենիքի տղերք։

Մեր երկիրը Հայոց
Ստահակներից,
Աղտ ու կեղտից մաքրող
Ապաքինող,
Հոգու պարտքի
Ու հավատքի տղերք,

Սահմաններին կանգնած,
Մեր պահապան
Ու մեր վահան տղերք,
Մեր զորության տղերք,
Հզորության տղերք,
Մեր մարտերում ընկած
Եվ փառապանծ, անանց,
Մեր լուսաբաց տղերք։

Ես ի՞նչ անեմ արդյոք
Ու ո՞նց անեմ,-
Սիրտս հանեմ,
Ձեր ճամփեքին ցանեմ,
Իմ աղոթքը մանեմ,
Թոն ու թուխպը
Վանե՜մ-տանե՜մ,
Գավիթները հույսի
Խնդությունով բեռնեմ,-
Ես ձեր բազկին մեռնեմ,
Ես ձեր զարկին մեռնեմ՝
Մեր հայրենի հողից
Ոչ մի թիզ չտվող,
Չարին ըմբոստացող,
Չստրկացող
Եվ թշնամյաց ձեռքից
Մասիս սարը բերող,
Միահամուռ ու կուռ
Արևաբույր տղերք,
Լույսի համբույր տղերք,
Մաքրամաքուր տղերք,
Մեր ճշմարիտ տղերք,
Առյուծասիրտ տղերք,
Աստծով լցված տղերք,
Հաղթանակած տղերք…