Previous Story
ՊԱՅՔԱՐԻՐ ԵՎ ԿՀԱՍՆԵՍ
Թալինցի տասնյոթ պատանիներ, պարմանուհներ և հզոր ուժի երիտասարդներ 2022 թվականի հունիսի 18-ին մի քանի ժամում իրար հետևից սպորտային ռեկորդներ սահմանեցին։ Բոլոր անհավանական հաջողությունները ըստ կարգի արձանագրվել են, և ռեկորդակիրների անունները, հուսանք, շատ շուտով տեղ կգտնեն Գինեսի ռեկորդների գրքում կամ հայկական «Դյուցազնագրքում»։ Հայ նորընծա դյուցազունների կողքին կան փորձառուներ, որոնց անունները բազմիցս արձանագրվել են Գինեսի գրքում, և հիմա նրանք գերազանցեցին իրենց իսկ սահմանած ռեկորդները կամ հանդես եկան նորատիպ մարզանքներով։ Նրանցից Ռոման Սահրադյանի գլխավորությամբ շուրջ յոթը ամիս մարզվող՝ տարբեր տարիքի մարզիկներն անհավանական արդյունքներ ցուցադրեցին տարբեր վարժություններում։ Նման արդյունքների հասնելը հնարավոր է դարձել Թալինում անցյալ տարեվերջին «Դյուցազնատուն» խորհրդանշական անվամբ մարզասրահի հիմնումով։ Այն բացվել և գործում է «Hi-Am» հիմնադրամի աջակցությամբ, որն ի թիվս սոցիալական աջակցության, մշակութային և այլ նախաձեռնությունների, հատուկ ուշադրություն է դարձնում կրթական ուղղվածության գործողություններին։ Մարմնավարժական դաստիարակության այս դպրոցի հոգևոր հայրն ու ոգեշնչողը հայկական «Դյուցազնագրքի» հանձնաժողովի նախագահ Վարդան Թովմասյանն է, Իջևանի գինու, կոնյակի գործարանն էլ իր բաժին ներդրումն ունի այս ծրագրի իրագործմանը։Այսքան կարճ ընթացքում 10-12 տարեկանից սկսյալ մինչև հասուն երիտասարդ տասնյոթ մարզիկների՝ ռեկորդներ կատարելուն նախապատրաստելը ֆանտաստիկայի ժանրից է։ Բազում հյուրերի և թալինցիների, հովանավոր կազմակերպությունների ներկայացուցիչների աչքի առաջ տեղացի մարզիկները ցուցադրեցին իրենց գերմարդկային ուժն ու կարողությունը։ Հարկ է մեկ առ մեկ թվել այս սպորտային «հրավառության» բոլոր մասնակիցներին, որոնց՝ հաջողությանը հասնելու կամային հատկությունները, համառությունն ու ջանադրությունն ուղղորդելով՝ Ռոման Սահրադյանը հասել է գերազանց արդյունքի։ Վերջինս կրթությամբ պատմաբան է և դասավանդում է դպրոցում, լավ գիտե իր անելիքը՝ հայրենիքի սիրով և պատվախնդրությամբ տոգորուն սերնդին կրթելուն համահավասար ամրացնել նաև մանկանց ու նորահաս երիտասարդների մարմնի ուժը, դիմակայելու կորովը, հաղթելու վճռականությունը։ Յուրաքանչյուրի «գինեսյան» վարժության ընթացքում, երբ նկատվում էր մարզիկի հոգնածությունը, լսվում էր մարզչի մեղմ միակ ձայնով ասած, բայց համոզիչ հորդորը՝ «Պայքարի՛ր, պայքարի՛ր»։ Ու հենց այդ պայքարի, սեփական անձի կարողություններն առավելագույնս բացահայտելու և ի գործ դնելու շնորհիվ էր, որ մեկը մյուսին հաջորդելով՝ ռեկորդներ սահմանվեցին։ Ռոմանն ինքը պտտաձողի վրա գոտկատեղի շուրջ անընդմեջ ետ պույտներ կատարելով մեկ րոպեում ՝ թարմացրեց իր իսկ սահմանած ռեկորդը։ Տաթև Մանուկյանն առաջինն է, որ պտտաձողից երկու ձեռքով կախ դրությունից պահեց իր մարմնի ծանրությունը՝ բացահայտորեն գերազանցելով Գինեսի հանձնաժողովի սահմանած նվազագույն սանդղակը։ Մի այլ՝ մեզանում քիչ հայտնի վարժությունում, որ ունի «ռուսական շրջադարձ և արտակորում առաջ» անվանումը, հաջող արդյունք ցույց տվեց Ռիտա Խաչատրյանը։ Նման ռեկորդ աշխարհում կատարող չի եղել․ Գինեսի հանձնաժողովը նվազագույն սանդղակը մեկ րոպեում սահմանել է 10 անգամ։ Ռիտան փորձեց և հաջողեց։ Պտտաձողից ամեն ձեռքի մի մատով կախ պահելով սեփական մարմնի ծանրությունը 1 ր 15 վրկ-ից ավելի՝ Արտակ Սարոյանը ևս գերազանցեց գինեսյան սահմանված սանդղակը։ Համազասպ Հլոյանը ձողից կախ դրությունից ձեռքերն անընդմեջ փոխելով՝ կատարեց «ձգում դեպի վեր» վարժությունը՝ ձգտելով գերազանցել հույն մարզիկ Օրեսիսի ռեկորդը։ Մինչև 14 տարեկանների մեջ առաջինը Նարեկ Գևորգյանը երկու ձեռքով կախ դրությունից 1 րոպեում անընդմեջ պտտաձողին ոտնաթաթերի հպումներ կատարեց։ Գոռ Մանասյանը պտտաձողից մեկ ձեռքով կախ դրությունից մինչև չորս րոպե պահեց մարմնի ծանրությունը։ Դյուցազնագրքում սահմանված ժամկետները գերազանցելով կամ առաջին անգամ իրենց տարիքային խմբերում տարաբնույթ վարժություններով ելույթ ունեցան Գալուստ Գալստյանը, Վազգեն Սաֆարյանը, Մանվել Սահրադյանը, Սուրեն Մադաթյանը, Գրիգոր Մանուկյանը, Արտակ Սարոյանը։ Մեկ ձեռքով, հետո էլ՝ բութ մատով 3 լիտրանոց ջրով լի տարաները, անգամ հավելյալ 15 կգ-անոց ծանրաքարերով բարձրացրեցին Հովհաննես և Մանուկ Եղիազարյան եղբայրները։ 17-ամյա Դավիթ Ալեյանը մի ձեռքով գետնից բարձրացրեց և գլխավերևում մեկ րոպե պահեց 36,8 կգ-անոց ծանրաձողը։ Իսկ Սասուն Ավետիսյանը գետնին հորիզոնական դիրքից մի րոպեում 75 անգամ բարձրացրեց և մինչև ուսագոտին պահեց 8 կգ-անոց կցագունդը։ Եղան նաև այլ ցուցադրական ելույթներ՝ մեկը մեկից դիտարժան և անհավանական թվացող։Սպորտային այս յուրահատուկ միջոցառմանն իրենց հունարն ի ցույց դրած բոլոր մասնակիցներին հուշամեդալներ և պատվոգրեր հանձնեցին «Hi-Am» հիմնադրամի հիմնադիր-տնօրեն Նշան Աճեմանը, «Դյուցազնագրքի» հանձնաժողովի նախագահ Վարդան Թովմասյանը, Թալին համայնքի ղեկավար Տավրոս Սապեյանը, Իջևանի գինու, կոնյակի գործարանի գործադիր տնօրեն Գևորգ Ասլանյանը։ Նախագծումներ կան առավել բարելավելու «Դյուցազնատուն» մարզասրահի աշխատանքային պայմանները, բարենորոգել սրահին հատկացված շինության կից հատվածները ևս։ Հեռահար ծրագրերում դյուզազնատների հիմնումն է նաև Հայաստանի այլ մարզերում ևս։ Իսկ թալինյան «Դյուցազնատան» կարգախոսը հետայսու կլինի՝ «Պայքարիր և կհասնես»։ Հասմիկ Սարգսյան
