Previous Story
ՆՈՐ ՏԱՐՈՒԱՆ ԱՂՕԹՔ
Posted On 01 Հնվ 2024
Comment: 0
Տէ՜ր Աստուած,
Այս տարուան աւարտին,
շնորհակալութիւն կը յայտնեմ
քեզմէ ստացած ամէն բանի համար.
շնորհակալութիւն կեանքին ու սիրոյ համար,
ծաղիկներուն, օդին, արեւին,
ուրախութեան ու ցաւին,
ամէն կարելի եղած բաներուն,
եւ այն բաներուն՝ որ չկրցայ կատարել ու իրագործել։
Քեզի կը նուիրեմ յաջողութիւններս,
կատարած գործերս,
եւ իմ ձեռքս տրուած բարիքները։
Քեզի կը յանձնեմ իմ սիրելիներս,
հարազատներս ու բարեկամներս,
դրացիներս, մերձաւորներս,
ու ինձմէ հեռացած ազգակիցներս։
Ինծմէ օգնութիւն խնդրողները,
անոնք որոնց կրցայ օգնել,
անոնք որոնց հետ կիսեցի
կեանքս, աշխատանքս, ցաւս
եւ ուրախութիւնս։
Այսօր, ո՜վ Տէր, կ՚ուզեմ յատուկէն ներողութիւն խնդրել
վատնած ժամանակիս համար, վատ կերպով ծախսած դրամիս,
արտասանած վատ ու անպէտ խօսքերուս,
եւ անտեսած սիրոյն.
ներողութիւն չկատարած եւ վատ կատարած գործերուս,
առանց աշխուժութեան եւ եռանդի ապրած կեանքիս,
չկատարած ու յետաձգած աղօթքիս,
մոռացութեանս ու լուռ մնալուս.
պարզապէս ներողութիւն …. ամէն բանի համար։
Տէ՜ր Աստուած, Տէր ժամանակի եւ յաւիտենութեան,
քուկդ է այսօրն ու վաղը, անցեալն ու ապագան.
այս տարուան սկիզբը
քեզի կը նուիրեմ այն բոլոր գալիք օրերը,
եւ այն օրերը որ միայն դուն գիտես եթէ պիտի հասնիմ ապրելու թէ ոչ։
Այսօր քեզմէ պիտի խնդրեմ ինծի եւ սիրելիներուս համար,
խաղաղութիւն, ուրախութիւն,
ոյժ ու խոհեմութիւն,
սէր եւ իմաստութիւն։
Կ՚ուզեմ ամէն օր լաւատեսութեամբ ու բարութեամբ ապրիլ,
խցէ ականջներս որպէսզի անճիշդ, վատ բաներ ու բամբասանքներ չլսեմ,
Շուրթերս որպէսզի սուտ, վիրաւորիչ ու անձնասէր խօսքեր չարտասանեմ,
մինչդեռ բա՛ց էութիւնս բարիին՝
այնպէս որ իմ հոգիս լեցուի միայն
քու օրհնութիւններովդ ու բարիքներովդ,
եւ զանոնք կարենամ տարածել ամէն առած քայլիս ուր որ ըլլամ։
Տուր որ այս բոլորը կատարեմ Յիսուս Քրիստոսի անունով. Ամէն։
https://www.facebook.com/photo/?fbid=391001723583258&set=a.197891352894297
